الشروط والأحكام

استعمال موقع MedoO أو تطبيقه، أو عمل أي طلب، معناه الموافقة على هالشروط. مين ما كان مش موافق على بند منها، الأفضل ما يستعمل الموقع ولا التطبيق. هالشروط بتنطبق على الشراء من الموقع ومن التطبيق؛ الشراء من المحل بينحكمه إيصال المحل وقواعد المحل نفسه.

MedoO متجر ملابس ومستلزمات أطفال ورضّع، مركزه رام الله – دوار الساعة، فلسطين. عنده محل على الأرض، وموقع، وتطبيق على الهاتف. تفاصيل التواصل وساعات العمل موجودة بصفحة الاتصال.

• الحساب للبالغين فقط، وبيتفتح برقم هاتف بينتأكّد برمز بينبعت على واتساب، أو بحساب Google أو Apple.
• البيانات المكتوبة بالحساب لازم تكون صحيحة — العنوان ورقم الهاتف هنّ اللي بيوصل عليهن الطلب.
• صاحب الحساب مسؤول عن اللي بينعمل منه. أي استعمال مشبوه لازم يتبلّغ فورًا.
• الحساب بينحذف بأي وقت من التطبيق أو برسالة على واتساب، وتفاصيل شو بينحذف موجودة بصفحة حذف الحساب.

• كل الأسعار بالشيكل، وما بينضاف عليها ضريبة عند الدفع — السعر المعروض هو السعر النهائي للقطعة.
• الأسعار بتتغيّر بدون إشعار مسبق، بس الطلب المؤكّد بينحسب بسعر وقت الطلب.
• الطلب بينعتبر مقبول لمّا ينتأكّد من طرفنا، مش بمجرّد إرساله. إلنا الحق نرفض أو نلغي أي طلب — نفاد المخزون، خطأ بالسعر، عنوان خارج مناطق التوصيل، أو اشتباه باحتيال.
• لمّا نلغي نحنا الطلب، بينرجع المبلغ كامل إذا كان مدفوع.

الطرق المتاحة اليوم على الموقع والتطبيق:

• الدفع عند الاستلام: المبلغ بينعطى للسائق عند الباب. متاح للكل، مع حساب أو بدون.
• بطاقة الدفع (فيزا أو ماستركارد): بينمرّ عبر بوابة البنك العربي، والمبلغ بينسحب كامل وقت تأكيد الطلب مش وقت الشحن. رقم البطاقة بينكتب جوّا نافذة البنك وما بيمرّ علينا. الدفع بالبطاقة بيحتاج تسجيل دخول.
• Apple Pay: متاح على أجهزة Apple، وبينسحب من بطاقة حقيقية مربوطة بالمحفظة، فبينحسب دفع ببطاقة. كمان بيحتاج تسجيل دخول.
• رصيد ميدو: بيتغطّى فيه الطلب كامل أو جزء منه، لحاله أو مع أي طريقة من اللي فوق.

ما في تحويل بنكي وما في دفع عبر واتساب — أي حدا بيطلب هيك باسم المتجر، هاد مش نحنا. وتجّار الجملة المعتمدين إلهم ترتيب دفع آجل منفصل بيتّفق عليه معهن.

• الرصيد بيجي من المتجر بس: إلغاء طلب، أو قيمة إرجاع، أو تعويض بينضاف من الإدارة. ما في طريقة يتشحن فيها الرصيد بفلوس من الزبون.
• بينصرف على الموقع وبالتطبيق وبالمحل، كامل أو جزء منه.
• ما بينتهي، وما بينحوّل لحدا تاني، وما بينسحب كاش.
• للتأكّد إنّه صاحب الحساب هو اللي بيصرف، الصرف بالمحل فوق حدّ معيّن بيحتاج تأكيد على هاتف صاحب الحساب — إمّا رمز على واتساب أو موافقة على إشعار.
• الرصيد بينجمد لو كان في اشتباه باستعمال غير مشروع للحساب، لحد ما توضح الصورة.
• الحساب اللي فيه رصيد ما بينحذف قبل ما ينصرف الرصيد — لأنه حذف الحساب معناه فقدانه.

المستويات بتتحسب من عدد الطلبات المستلَمة ومجموع المشتريات مع بعض، ولازم يتحقّقوا التنين لرفع المستوى. كل مستوى بيعطي خصم ثابت على كل طلب، والمستويات الأعلى بتعطي توصيل مجاني. الطلبات الملغاة والمبالغ المرجَّعة بتنطرح من الحساب. أرقام المستوى الحالي والمتبقّي للمستوى اللي بعده بتنعرض بصفحة الحساب، وهي المرجع لأنها بتتحدّث لحظيًا. المشتريات من المحل بتنحسب كمان، بشرط ينكتب رقم الهاتف على الفاتورة وقت الشراء.

المناطق المخدومة وأسعارها والمدد المتوقّعة كلها معروضة بصفحة الشحنوبتُقرأ من نفس الجدول اللي بيحسب أجرة التوصيل عند الدفع، فما بتختلف عن اللي بينحسب بالسلة. المدد تقديرية وبتتأثّر بالطرق والإغلاقات. لو ما وصل حدا لاستلام الطرد، بيرجع الطرد إلنا وبنتواصل لترتيب الموضوع.

• الإلغاء الذاتي متاح مجانًا ما دام الطلب «قيد المراجعة» وما بلّش التجهيز وما انسلّم لشركة التوصيل — من صفحة «طلباتي».
• بعد ما يبلّش التجهيز أو الشحن، ما بيضلّ في إلغاء ذاتي، وبيضلّ التبديل والإرجاع بعد الاستلام.
• الطلب المدفوع بالبطاقة والمبلغ انسحب منه: الإلغاء بيصير بطلب إلغاء بينراجع من الإدارة، وبينتحدّد وين بيرجع المبلغ — على البطاقة أو لرصيد ميدو.

المدّة والشروط والرسوم كلها بصفحة التبديل والإرجاع ، وهي جزء من هالشروط.

• التقييمات والأسئلة والصور المنشورة لازم تكون عن تجربة شراء حقيقية.
• ممنوع أي محتوى مسيء أو غير لائق أو مضلّل أو بيخصّ حدا تاني. أي محتوى بينبلّغ عنه بينتراجع وبينشال، وصاحبه ممكن ينتمنع من النشر.
• نشر أي محتوى على المتجر بيعطي MedoO حق عرضه على صفحة المنتج وبقنوات المتجر، بدون مقابل.
• المساعد الذكي بيعطي معلومات إرشادية عن المنتجات والخدمة، وممكن يغلط. المعتمد هو صفحة المنتج والسعر وقت الطلب وهالشروط، مش كلام المساعد.

الصور والنصوص والشعار والتصميم على الموقع والتطبيق ملك MedoO. ممنوع نسخها أو إعادة استعمالها تجاريًا بدون إذن خطّي مسبق. الاستعمال الشخصي للتصفّح والشراء مسموح طبعًا.

• التأكّد من صحّة بيانات الطلب: العنوان، رقم الهاتف، المقاسات.
• الاستلام بالوقت المتّفق عليه، أو التواصل مع السائق لإعادة الترتيب.
• عدم استعمال الموقع أو التطبيق لأي غرض غير قانوني، وعدم محاولة الوصول لبيانات حسابات تانية.

MedoO مسؤول عن قيمة الطلب نفسه وعن إيصاله كما هو موصوف. وما بتتحمّل المسؤولية عن أضرار غير مباشرة، ولا عن تأخير سببه ظروف خارجة عن السيطرة متل الإغلاقات وأحوال الطرق، ولا عن انقطاع مؤقّت بالموقع أو التطبيق. المسؤولية القصوى بأي حال محدودة بقيمة الطلب.

هالشروط بتخضع للقانون الفلسطيني. أي خلاف بينحلّ ودّيًا أولًا، وإذا ما زبط بينحال لمحاكم رام الله المختصّة.

لأي استفسار عن هالشروط، عبر صفحة الاتصال أو على الرقم +970 592 373 836.